tenpo musi suli la
kasi sewi en kasi ma
li mama e lipu laso mute.
ma ale la soweli li kute
e toki tan soweli lawa Nopa.
ona la ale o tawa ona
o toki pona lon ma lawa.
ni la soweli ale li kama.
taso wan li awen weka:
ni li soweli loje Lena.
tenpo pini la ona li pali
e utala mute tawa ale.
ona ike li sona e ni:
soweli ante ale kin
li wile e ike tawa ona.
loje li kama ala tan sona.
kulupu li kama lon sike
la ona ale li pilin ike
tan soweli loje pi utala taso.
(wan li ante, li pimeja walo.)
ni la kulupu li lon a.
soweli Kiken en soweli poka
li kama lon sinpin kulupu.
wawa la ona Kiken li mu
e toki: ‘lawa Nopa o,
sina la nasin en nimi li jo
e wawa e pona e mute. ni la,
pakala mi o sona sina.
pona mi li weka ale.
soweli Lena la mi awen
jo e utala e anpa.
meli mi la ona li unpa!
loje li pana kin e jelo
sama kasi sama telo
lon soweli lili tan mi mama a.
soweli tu la lukin li pakala.
taso ike sin li open:
tan jaki ni la ona loje
li wile toki lon tenpo lawa.
nasin toki la lon ala
li wile weka tan toki soweli.
soweli Lena li wile toki
la ona o luka e ilo sewi
o toki lon e ona e meli.
taso ijo sewi li kama
la ona li wile toki ala
li weka tawa tomo ona.
soweli ale ni li sona.
wawa Nopa mi o kute,
utala ona li suli mute:
len ale tan ma tomo Ken
li kama lipu sitelen
la mi ken ala pana e ale.
ni la uta mi o lape.
taso meli mi la anpa
o awen sona lon kulupu lawa
o anpa sama e soweli Lena.’
soweli Kiken li pini li weka
la soweli ante li toki e ijo.
ona lili li nimi Ĝentilo
li mu lon toki Epelanto:
tenpo lete la jo taso
li moku lili palisa.
soweli Lena li alasa
e suwi ni lon uta kiwen.
poka ona la soweli Sipe
li kute e toki li pilin nasa.
linja ona li tawa wawa.
lon insa sike la ona li kama
li lukin tawa soweli lawa:
‘lawa mi o! loje Lena
li ike ni a tawa sina
la soweli ale lon ma suli
li ken toki ike e ijo lili
tan tenpo ante tan wile nasa.
soweli Sensilo la palisa
li pini tan sike suno mute a.
mi o pona e sona utala:
mi taso li jo e moku.
jan li pali lon palisa tomo
la mi tawa ni lon alasa pan
lon tenpo pimeja lape jan.
taso mi toki ike ala.
soweli lili li pilin wawa
la ona o toki tawa mi a
o toki ala tawa sina.
mi kulupu o kute e ante.’